《條女很清楚收兵好過嫁人》
呢首歌我相信唔需要多作介紹，大家都知道係咩嚟。
事先聲明，其實成首歌並唔係我一個人寫晒，當中亦歸功不少創意無限嘅高登巴打（可能有絲打掛），亦要感謝子如巴打主唱，以及用心極速製作 MV 嘅巴打們。
由於寫呢首歌 Chorus 之時，正正係小弟脫離兵役之時，所以根本就唔預計首歌會有咁大迴響。不但上咗網典，佔咗最神級二次創作選舉嘅一席位，去年更加有 Board Game 以同名推出一個體驗女神兵仔嘅遊戲，影響後世之深，事前根本無諗過。猶幸首歌受網民歡迎，所以小弟個朵都叫做有啲巴打認識。
《條女很清楚收兵好過嫁人》的創作背景
延伸閱讀：
香港網絡大典－《條女很清楚收兵好過嫁人》
香港網絡大典－最神級二次創作選舉
《條女很清楚收兵好過嫁人》港版 Board Game：30 分鐘體驗當兵感覺
好喇，消費完首歌，係時候講返正題。到底有啲咩因素，令一首膠歌／口水歌容易令人記住，一記就記你幾年呢？
我寫《條女很清楚……》之時，同過一個女仔發生咗啲唔開心嘅事。總之某程度上就係覺得佢成日同我好 Close，但事實上佢又唔係對我有 Feel，想行埋啲就被拒絕之類。從心態上出發，當時嘅心情寫呢首歌，正好適合。
Hook Line：一首歌令人記住的關鍵
條女很清楚收兵好過嫁人 真的身份不過女神
只要女神未夠開心 便集齊萬馬千軍
好聽啲佢當係熟人 衰啲講係用嚟犧牲
落力辛勞過 亦不能步近
一首歌成功之處，至少，Hook Line 要寫得好。咁咩係 Hook Line 呢？即係個中心思想。例如中學時代作議論文，進入論證段落，你喺一段嘅開頭必然係寫個論點係乜。咁廣東歌就無作文咁複雜，無需要三個論點，只求一句你記得嘅歌詞。而呢句歌詞，學我師父咁講，愈似原詞愈好。
用其他比較更出名嘅歌嚟做例子，相信呢首好難未聽過：
《失暖王》
「我是一個西伯利亞人 冬天的冠軍」，唔好睇少呢 14 個字，因為喺呢 14 個字入面，完完全全地利用咗大家對《失戀王》嘅認識去建築自己個主題。
每段戀愛都會認錯人 失戀的冠軍
我是一個西伯利亞人 冬天的冠軍
為方便大家閱讀，我用不同顏色去將呢首歌嘅 Hook Line 分拆成上面咁樣。雖然大家嘅詞性未做到平行，但結構上係完全一樣。既然大家對《失戀王》耳熟能詳，咁「我是一個西伯利亞人，冬天的冠軍」就十分容易入腦。
借用原曲結構：令 Hook Line 更容易入腦
咁講返自己首歌，其實道理一樣：
流水很清楚惜花這個責任
條女很清楚收兵好過嫁人
純粹學術討論角度，呢一句 Hook Line 比西伯利亞人更加利用到大家對舊詞嘅認識。神奇之處係《落花流水》都係寫緊類似嘅嘢，只係手法上融情入景，但二次創作當然唔會咁玩。開門見山從來都係最入耳嘅方法。
而「條女很清楚收兵好過嫁人」呢一句，結構同舊詞一樣之餘，喺詞性唔一樣嘅相同結構當中，其實係用返同一個韻（「這個」VS「好過」，「責任」VS「嫁人」）。所以，不難解釋個標題係有聲，呢個亦係不少歌曲成功之處。
Chorus 結構：改編歌詞愈似原詞愈好？
Chorus 之中，其實《條女……》亦都沿襲舊詞嘅結構：
流水很清楚 惜花這個責任
真的身份不過送運
這趟旅行若算開心
亦是無負這一生
水點蒸發變做白雲
花瓣飄落下游生根
淡淡交會過 各不留下印
條女很清楚 收兵好過嫁人
真的身份不過女神
只要女神未夠開心
便集齊萬馬千軍
好聽啲佢當係熟人
衰啲講係用嚟犧牲
落力辛勞過 亦不能步近
一般嘅改編歌詞，通常都盡量避免帶住原詞嘅影子。但改膠歌，的確係愈似愈好。基本上成個 Chorus 都係跟原曲一樣 Pattern，只要原曲夠 Hit，改出嚟嘅嘢有文有路，包無死。
最後一段 Chorus：改編歌詞的結構問題
至於最後一段 Chorus，的確唔係我寫。唔係話我要 Show Off，但一睇歌詞就知咩事：
條女終一天清醒遣散眾人 天兵身份急降蟻民
只要女神又有心癮 霎眼期盼再轉生
偏偏一走已是罪人 她都只會渴求新軍
再次孤獨了 害傷痕淚滲
但是兵役過 在心頭怒憤
文句不順已經出事，去到中間直情連結構都保唔住，難怪身邊有啲朋友都會問：「做乜最後個段咁嘅？」
「咁我返到屋企個 MV 都出咗世，唔通要人再改過咩？」
下一集講下用 Verse 做 Hook Line 嘅膠歌。
延伸欣賞：另一首二次創作歌曲
最後送多條片比大家，首歌正正係我師父所寫。若果覺得粗言穢語好多 Dirty 嘅，請按下讚後點擊上一頁。
《賭撚成熟時》 詞：雙魚已歿 唱：硬道理
延伸閱讀: 填詞技巧 – 神作是如何煉成的(下)
Pingback:粵語填詞技巧：神作是如何煉成的？Hook Line 與畫面感｜a仔．音樂．旅遊