填詞技巧 – 進階版0243 (下)

進階版0243 (下):0243實戰上的「彈性」

相信有好多人睇完上兩篇 ( 詳見 進階版0243 (上)進階版0243 (中) ) 之後都會嘩然,「嘩!你咁講咪即係話0243係靠感覺?」可以好肯定咁同你講,一個人本身有音感,其實唔用0243一樣都會知用咩野字落咩野音為之岩音,反之,天生無音感,又無學過既人,0243係其中一個方法,但亦不限於0243呢一個方法。老實講,我寫上一篇既時候都試過用好多唔同既音程去以0243表達,得出既結論亦只有一個──係不同既音程上,即使係同一個音,0243本身亦會出現變化,要塞返一個岩音既數值落去,講真,「試數」仲快過你「計出黎」,情況就等同你考CE/DSE既數學咁,做一條算式極為複雜既MC,答案得4個,代數搵答案點都快過你慢慢計,其實0243都係同一個道理。所以,黎到進階版既最後一篇,我會講埋最後兩個小技巧。

 

0243與02493

由《淺談0243 (上)》開始,其實都提及過好幾次,若果要比較準確地去使用數字黎代表不同既音高以方便填字,0243只係最基本既數字,係4同3中間其實仲有個9。而9呢個值,有少許「拉音」既情況。

何謂「拉音」

首先要利申既係,我無讀過粵語既theory,「拉音」呢個term未必係學名,純粹我老吹出黎,相信絕大部分香港人土生土長講廣東話既,都無點學過廣東話既拼音,反而英文同國語就比較多接觸。

以國語為例,國語四聲係「-/✓\」,用數字去代表就係3-9-0-3,寫國語歌無0243呢樣野,亦根本唔會有2同4既文字出現,所以可以唔理「呢度既重點係,國語第二聲正正就係9呢個數值,先低後高,我就稱之為「拉音」。順帶一提,國語第三聲都係拉音,但實際操作上,即係講野既時候,如果第三聲唔係出現句子既最尾,為方便朗讀起見,通常都無左後面「後上」既部分,只會留低前面壓低把聲既部分,所以一般都係當0咁睇。

講返粵語喇,如果以C Major去對返02493,以C = 0作為基礎音,於是C, D = 0,E = 2 ,F = 4,G = 3,咁9呢,因為先低後高既原因,所以9就係先F#後G,可見9起初係比4高半度,最後同3一樣音高,亦解釋到點解之前一直都話9可以暫時用3取代。

甚至乎,有人會加埋5係4同9之間,其實5亦都係先低後高,起初屬於4既範圍,後來升高小小,但又未到半度,所以我自己就唔用5呢個字,反而呢樣我會留返係「長短音」既文章再講,不過容後再談。

02394 實際應用

024433   333333442433
忘掉愛過的他 當初的喜帖金箔印著那位他

3333442023442200   020242
裱起婚紗照那道牆及一切美麗舊年華 明日同步拆下

024433   333344224200
忘掉有過的家 小餐枱沙發雪櫃及兩份紅茶

333333443   34004/42004
溫馨的光境不過借出到期拿回嗎

33423024
等不到下一代 是嗎

用返之前既例子《囍帖街》,問大家兩個問題:

1) 如果唔計歌詞,你會將邊幾個3音轉成9 ??

2) Wyman用左邊幾個9既文字??

024433   339333442433
忘掉愛過的他 當初的「喜」「帖」金箔印著那位他

3333442023442200   020242
「裱」「起」婚紗照那道牆及一切美麗舊年華 明日同步拆下

024433   339344224200
忘掉有過的家 「小」餐「枱」沙發雪櫃及兩份紅茶

339339443   34004/42004
溫馨的光「境」不過借出到期拿回嗎

33423024
「等」不到下一代 是嗎

3、9互通

我將自己認為係9既位都用藍色highlight左,而Wyman實際用左9既文字就以「」表示。哈哈!幾乎全軍覆沒,咁到底係我錯定Wyman錯定大家都錯?? 唔係,係大家都岩至真,而家作詞呢,3同9都係互通既,除非受長短音影響,否則3、9互通係唔會影響到個音準,最重要既係,歌手唱個粒音既時候,咬字要清晰,而如果本身粒音唔係太短,就唔會將「裱起」唱做「標希」架喇。

「到期」係42定40?

「到期拿回嗎」係個好好既斷句例子。34004係唔用斷句所做出黎既音程,42//004係斷句既音程,「到期//拿回嗎」好明顯係可以拆做兩個phrase,所以Wyman寫既絕對正確。

眼利既你,可能已經發覺,「到期」係粵語發音上,應該係40,點解首歌明明係42音,Wyman塞個40既字落去,但唱出黎又毫無違和感,到底點解呢?

粵語填詞既「走盞位」

一直以來我都唔認為AI係音樂創作上能夠完全取代人類,因為好既音樂,必須要創作到個靈魂出黎,而使到音樂本身就有生命。要掌握音準,除左要熟記方法同規則,更加要識游走灰色地帶。總之,規矩係死既,人係生既,音樂係有靈魂既,你既目的係岩音,係唔好寫左首教會歌出黎,而唔係0就0,2就2,4就4,3就3。

一般而言,斷句本身係一個走盞位,例如「到期拿回嗎」我寫作「可以拿回嗎」,即係用34004 (或者94004)去寫,同樣岩音,無違和感,呢種已經係一個走盞位,令你可以使用既Combination大大增加。

另一個常用既走盞位係2當0,0當2。雖然0同2本身差成一度,但係唔少時候用得0同2都係比較低音既位置,亦係相對唔使點發力既地方。新聞都有講,人腦其實係有個Photoshop,識得將自己係鏡內既樣P到正正常常,起碼唔會令你想打爆塊鏡,保障人身安全,同樣道理,人腦都係一個好好既Mixer,識得將少許唔岩音既詞語變返做自己成日聽既詞語。

「到期拿回嗎」呢句實際上唱出黎係應該聽到「到冀拿回嗎」,但因為呢句正正係down progression (呢個名詞係我作既),所以就算你聽到「到冀」,甚至「都冀」,你個腦都會即時Reflect返「到期」呢個常用既詞語。呢樣,亦係黃志華先生係《粵語歌詞創作談》之中提過既情況。唯一標準就係,你有少少唔岩音之餘人地聽到你句野會即時諗得返你原本所寫既用字,就可以過關,所以《相愛很難》既「內疚卻也無力歸還」,旋律明明2-3-4-4-0-2-3-0,前面既2-3會令你聽到「內鳩」,腦海就會不斷地聽到「內鳩」,呢個就係一個走盞走過界既最佳例子。

內鳩卻也無力歸還

其實除左0同2之外,2對4、4對9或者4對3都會出現類似既走盞位,就係因為0-2-4-(9)-3本身無一個明確既標準到底要落係邊個音高之上,所以你話界線模糊,我就會覺得,灰色地帶愈多,走盞位愈多,可以用既詞語愈多,歌詞就可以更有靈魂,更容易觸動到人。

希望大家可以好好享受填詞既樂趣。

 

其他填詞技巧:

填詞技巧 – 書面語VS口語

填詞技巧 – 使用入聲字的技巧

填詞技巧 – 韻腳的通押

填詞技巧 – 用韻的選擇

填詞技巧 – 淺談0243 (上)

填詞技巧 – 神作是如何煉成的? 惡搞歌大解構 (上)

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s